حدث_بالفعل

‫#‏حدث_بالفعل‬ في بداية حياتي - على اعتبار إن عندي 70 سنة يعني - كنت شغال في شركة ليها فروع في دول كتير.

وكان بطبيعة عملنا (مهندسين برمجيات) بنتأخر كتير في الشغل..وكان النظام إن اللي يتأخر بعد الساعة 5 يحق ليه وجبة

بتجيبهاله الشركة (دي نقطة على جنب كده). كمان بطبيعة هذا النشاط...فاحنا كنا بنصمم برامج للبنوك تمنها ملايين الدولارات.

الشاهد إن في فترة من الفترات كانت الشركة بتمر بمشكلة مالية كبيرة وكانوا عايز يتخذوا بعض الاجراءات لعبور الأزمة...

وطبيعي جدا في حالة زي دي إنك عشان تعبر الأزمة تفكر بشكل منطقي...فتحاول تفتح لنفسك أسواق جديدة في أماكن مختلفة

أو تغري زباينك الأصليين بعروض تخليهم يعملوا عندك شغل زيادة أو...إلخ. لكن الواقع كان مختلف شوية... مدير الإدارة اللي

تعداد موظفيها يتخطى ال 300 موظف كان عايز يوري الإدارة العليا للشركة إنه راجل برنس وبيعرف يجيب الديب من ديله...فما كان

منه إلا إنه يتخذ شوية قرارات اذكر منها على سبيل المثال إنه خلي الوجبة تبقى للي يقعد بعد الساعة 8 مش الساعة 5 وتكون

بموافقة مديرك...كمان الحمام ما يتحطش فيه يوميا غير بكرة مناديل واحدة ولو خلصت ما يتحطش تاني غير في اليوم اللي بعده...

وغيرها من القرارات العجيبة. طبعا احنا كنا مستغربين جدا...الراجل عمل شوية حركات وفر بيها للشركة في النهاية 20 أو 30 ألف

جنيه..وشايف إنه كده عمل اللي عليه وزيادة إنما في واقع الأمر هو زاد من غضب الموظفين وخنقتهم...وبالتالي انعكس ده على

إنتاجية الموظف. يا ريت الموضوع خلص على كده...إنما بعدها بفترة كنا رايحين الشغل الصبح..فوجئنا واحنا بنخش الشركة إنهم

جامعين كل الموظفين وواخدينا على اجتماع مفاجئ...الاجتماع ده كانوا بيعلنوا فيه عن مشروع مفاجأة... مشروع جامعين فيه كل

حاجة ممكن تتخيلها في الدنيا تخص برامج البنوك...والمفاجأة الأكبر إنهم كانوا محددين موعد تسليم المرحلة الأولى بعد 6 أشهر

تبدأ من النهاردة (يوم الاجتماع)!!!! ولكم أن تتخيلوا إن برامج أصغر من كده بكتير بتاخد سنتين وتلاتة شغل عشان تتسلم. طبعا

النتيجة النهائية معروفة...بعد عدة أشهر من الخسائر والتخبط الإداري الرهيب تم التخلص من هذا المدير وعدة مديرين آخرين

ورجعت الميه لمجاريها وكأن شيئا من كل هذا الهراء لم يكن. واضح إن كل الفشلة بيقرأوا من كتاب واحد

‫#‏السيسي_أسلوب_حياة‬

_______________________



واحدة من اكبر شركات الاتصالات في العالم واللي كنت شغال فيها في نفس الفترة تقريبا عملت كده بالظبط بس مش مدير اللي عمل كده مشت CEO اجنبي وجابت مصري يعمل كده عشان

تقريبا معرفوش يفهموا الاجنبي ان وقف مكن البيبسي والنسكافيه والمنناديل من الحمام هيوفر للشركة لكن المصري فاهمها وهيعملها لوحده منغير مايقولوله المصرنه اسلوب حياة