كتبها : محمد سلامه المصري عفا الله عنه . محمــد بـن سلامــه علــى

أخـــــى المتــــزوج —— أختــــى المتــزوجه ——- لحظه من فضلكـــم



إيه ياابنى انتا وهى ده !! إيه ايللى انتوا عاملينه فى بعض ده !! أنا مش مصدق نفسى !!

بقى انتــوا تعملوا فى بعض كده !! خنـــاق ومشاكل ودايما صوتكم عالى ونبرتكم مندفعه ومحدش فيكم بيستحمل غلطه ولا كلمه من التانى ليه كده !!! لااااااا أكيد فيه حاجه غلط

——–عـــارفين هى إيـــه ——— * هى إنكــــم متزوجين *——-

فعـــلا لو مكنتوش اتجوزتم مكنتوش هتعملوا فى بعض كده …. فاكرين أيام الخطوبه

فاكرين لما كنتوا بتستنوا مكالمة التليفون من بعض بلهفه وشوق ؟! فاكر لما كنت بتبقى رايح عندهم وانتا مش على بعضك من فرحتك وشوقك ليها …. فاكر لما كنت بس تحس إنها نفسها فى حاجه أو فيه حاجه زعلتها كنت بتعمل المستحيل علشان ترضيها ؟!

وانتى فاكره لما كان النوم بيطير من عنيكى من التفكير فيه … والشوق إلى اليوم ايللى يتقفل عليكم فيه باب واحد ؟! فاكره لما كان دايما صوتك منخفض وهادى وانتى بتتكلمى معاه ؟! فاكره اما كنتى بتتشيكى وتلبسى أحلى حاجه عندك لما يكون هو جاى عندكم ؟!

فاكر يوم مكنت تروح تشترى أحلى ورده وتعطرها بأحلى برفان وتديها لها هديه ؟!

فاكرين انتم الاتنين الأحلام الوردي الجميله ايللى كنتم بتحلموها مع بعض وتتفقوا عليها انكم تعيشوها بعد الجواز ؟؟!!

طيب أمال إيه حصل ؟! ياترى المأذون كانت عينه فى الجوازه ولا إيه ؟؟!

——————————————

بصوا بقى إحنا عاوزين ننسى خالص إننا متجوزين وعاوزين ناخد أجازه من بعض كده اسبوع عشرة أيام نشتاق فيهم لبعض ، أنت تشتاق لها وهى تشتاق إليك وعاوزين نعيش تانى أيام الخطوبه ونبدأ نخطط ونحلم تانى أحلام جميله ونرسم مستقبلنا مع بعضنا تانى

ياأخى عامل زوجتك مش على إنك زوجها عاملها على إنها حبيبتك ، خطيبتك إكتبلها جواب غرامى إوصفلها فيه مشاعرك ! أيوه والله بس اسمع بس كلامى

هاتلها ورده مخصـــوص واديهالها هديه مع كلمتين حلوين كده

اعمل اجازه كده مخصوص يوم من غير متقولها إنك أجازه واعملها مفاجأه وخدها إعزمها على الغداء فى مكان هى بتحبه وشوف إحساسكم هيكون إيه

ياسلام كده لو انتا قاعد فى الغرفه التانيه وتتصل عليها من موبايلك مكالمة عاطفيه حلوة كده من بتاعة أيام الخطوبه .! متستغربش بس اعمل كده وانتا تعرف ومتقولش بقى كبرنا على الكلام ده وعندنا عيال وهنكسف ولا مش هضعف قدامها والكلام الفاضى ده جرب وانتا تعرف أمال كنت بتعمل كده أيام الخطوبه ليه !! مع إنك كان حرام عليك .

———————————–

وانتى ياست هانم تعالى هنا إيه بقى ايللى انتى عاملاه ده !! هه!! هو انتى طول النهار وقفاله فى المطبخ وهدومك مبقعه والسكينه والبصله فى إيدك ؟!

وكل ميكلمك تطلعى فيه تاكليه ومحسساه انك بتعمليله جميله ؟!

هو كل ميجى من شغله يلاقيكى لسه مجهزتيش الغدا ؟! ويقعد يستنى ساعه ولو استعجلك تتخانقى معاه ؟!

هو مفيش يوم كده ييجى من شغله يلاقيكى مش بهدوم البيت التعبانه ايللى كلها بقع دى ؟!

ياستى هو نفسه مره يرجع كده من شغله يلاقيكى لابسه أحلى لبس عندك ومتزوقه ويشوفك يفرح ونفسه تتفتح بدل ميبقى جاى عارف إن هو هيلاقى أم 44 منتظراه فى البيت ( متزعليش منى بس انتى بتعملى كد فعلا )

هقولكم إيه ولا إيه انتم الاتنين ؟!! كفايا عليكم كده النهارده لحسن تضربونى بس اسمعوا الكلام وفكروا فيه وعيشوا مع بعض ( حبيب وحبيبته ) مش زوج وزوجته ولا أم العيال وأبوهم ماشى متفقين ؟

جربوا بقى كده وابقوا قولولى إيه النتيجه ومتنسوش تدعولى ان شاء الله

ابنكم الصغير

محمد سلامه

*ملحوظه * كل مااستدللت به من أيام الخطوبه ليس إقرار له ولكن أردت أن أذكرهم بما كانوا عليه من موده وسكينه وهدوء وحب وإلا فكل هذه مخالفات شرعيه وليس للخاطب حق عند مخطوبته إلا أنه وعد بالزواج فقط والله المستعان **